Псалтирь об Имени Божием

И похвалятся о Тебе любящии имя Твое.

Исповемся Господеви по правде Его и пою имени Господа Вышняго. Господи, Господь наш, яко чудно имя Твое по всей земли, яко взятся великолепие Твое превыше небес. Господи, Господь наш, яко чудно имя Твое по всей земли. Возвеселюся и возрадуюся о Тебе, пою имени Твоему, Вышний. И да уповают на Тя знающии имя Твое, яко не оставил еси взыскающих Тя, Господи. Воспою Господеви благодеявшему мне и пою имени Господа Вышняго. Сего ради исповемся Тебе во языцех, Господи, и имени Твоему пою. Услышит тя Господь в день печали, защитит тя имя Бога Иаковля. Возрадуемся о спасении твоем и во имя Господа Бога нашего возвеличимся. Сии на колесницах, и сии на конех, мы же во имя Господа Бога нашего призовем. Повем имя Твое братии моей, посреде церкве воспою Тя. Душу мою обрати, настави мя на стези правды, имене ради Своего. Ради имене Твоего, Господи, и очисти грех мой, мног бо есть. Принесите Господеви славу имени Его, поклонитеся Господеви во дворе святем Его. И имене Твоего ради наставиши мя, и препитаеши мя. Яко о Нем возвеселится сердце наше, и во имя святое Его уповахом. Возвеличите Господа со мною и вознесем имя Его вкупе. Молитва по 5 кафисме: И прославлю со Ангелы и всеми святыми Твоими всечестное и великолепое имя Твое, Отца и Сына и Святаго Духа, ныне и присно, и во веки веков, аминь. Блажен муж, емуже есть имя Господне упование его. О Тебе враги наша избодем роги, и о имени Твоем уничижим востающыя на ны. О Бозе похвалимся весь день и о имени Твоем исповемыся во век. Аще забыхом имя Бога нашего и аще воздехом руки наша к богу чуждему. Воскресни, Господи, помози нам и избави нас имене ради Твоего. Помяну имя Твое во всяком роде и роде. Молитва по 6-й кафисме: И помяни, Господи, всех призывающих имя Твое во истине: помяни всех, блага или сопротивная нам хотящих: вси бо человецы есмы, и всуе всяк человек. По имени Твоему, Боже, тако и хвала Твоя на концах земли. Исповемся Тебе во век, яко сотворил еси, и терплю имя Твое, яко благо пред преподобными Твоими. Боже, во имя Твое спаси мя, и в силе Твоей суди ми. Волею пожру Тебе, исповемся имени Твоему, Господи, яко благо. Молитва по 7-й кафисме: Благодарю Твое многопетое имя, благодарю Твое неисповедимое на мне благоутробие, благодарю безприкладное Твое долготерпение. <...> и спаси нас имене ради Твоего святаго, имиже веси судьбами. Яко Ты, Боже, услышал еси молитвы моя, дал еси достояние боящымся имене Твоего. Тако воспою имени Твоему во веки, воздати ми молитвы моя день от дне. Тако благословлю Тя в животе моем, о имени Твоем воздежу руце мои. Молитва по 8-й кафисме: Возвесели сердце мое, во еже боятися имене Твоего Святаго, занеже велий еси, и творяй чудеса. Ты еси Бог Един, и несть подобен Тебе в бозех, Господи, сильный в милости, и благий в крепости, во еже помогати и утешати, и спасати вся уповающыя на имя Твое. Воскликните Господеви, вся земля, пойте же имени Его, дадите славу хвале Его. Вся земля да поклонится Тебе и поет Тебе, да поет же имени Твоему, Вышний. Воспойте Богу, пойте имени Его, путесотворите возшедшему на запады. Господь имя Ему, и радуйтеся пред Ним. Восхвалю имя Бога моего с песнию, возвеличу Его во хвалении. И семя рабов Твоих удержит и, и любящии имя Твое вселятся в нем. Молитва по 9-й кафисме: И сице предстану неосужденно пред страшным престолом Твоим, славя и воспевая пресвятое Твое имя во веки, аминь. От лихвы и от неправды избавит душы их, и честно имя Его пред ними. Будет имя Его благословено во веки, прежде солнца пребывает имя Его. Благословен Господь Бог Израилев, творяй чудеса Един. И благословено имя славы Его во век и в век века, и исполнится славы Его вся земля: буди, буди. Возжгоша огнем святило Твое, на земли оскверниша жилище имене Твоего. Доколе, Боже, поносит враг? Раздражит противный имя Твое до конца? Помяни сия, враг поноси Господеви, и людие безумнии раздражиша имя Твое. Да не возвратится смиренный посрамлен, нищ и убог восхвалита имя Твое. Исповемыся Тебе, Боже, исповемыся Тебе, и призовем имя Твое; повем вся чудеса Твоя. Ведом во Иудеи Бог: во Израили велие имя Его. Молитва по 10-й кафисме: К тамошнему миру пойду, хваля и благословя выну всесвятое имя Твое, Отца и Сына и Святаго Духа, ныне и присно, и во веки веков, аминь. Пролей гнев Твой на языки не знающыя Тебе, и на царствия, яже имене Твоего не призваша. Помози нам, Боже, Спасителю наш, славы ради имене Твоего, Господи, избави ны, и очисти грехи наша имене ради Твоего. И не отступим от Тебе; оживиши ны, и имя Твое призовем. Исполни лица их безчестия, и взыщут имене Твоего, Господи. И да познают, яко имя Тебе Господь, Ты един Вышний по всей земли. Вси языцы, елики сотворил еси, приидут и поклонятся пред Тобою, Господи, и прославят имя Твое. Да возвеселится сердце мое боятися имене Твоего. Исповемся Тебе, Господи Боже мой, всем сердцем моим, и прославлю имя Твое в век. Север и море Ты создал еси, Фавор и Ермон о имени Твоем возрадуетася. Блажени людие ведущии воскликновение: Господи, во свете лица Твоего пойдут, и о имени Твоем возрадуются весь день, и правдою Твоею вознесутся. И истина Моя и милость Моя с ним, и о имени Моем вознесется рог его. Яко на Мя упова, и избавлю и, покрыю и, яко позна имя Мое. Благо есть исповедатися Господеви, и пети имени Твоему, Вышний. Воспойте Господеви, благословите имя Его, благовестите день от дне спасение Его. Принесите Господеви славу имени Его, возмите жертвы, и входите во дворы Его. Да исповедятся имени Твоему великому, яко страшно и свято есть. Исповедайтеся Ему, хвалите имя Его. И убоятся языцы имене Господня, и вси царие земстии славы Твоея. Возвестити в Сионе имя Господне, и хвалу Его во Иерусалиме. Благослови, душе моя, Господа, и вся внутренняя моя имя святое Его. Исповедайтеся Господеви, и призывайте имя Его, возвестите во языцех дела Его. Хвалитеся о имени святем Его, да возвеселится сердце ищущих Господа. Молитва по 14-й кафисме: Благодарим Тя, Господи Боже спасений наших, яко <…> поставил еси нас в поклонение честнаго и славнаго имене Твоего. И спасе их имене Своего ради, сказати силу Свою. И собери ны от язык исповедатися имени Твоему святому, хвалитися во хвале Твоей. И ты, Господи, Господи, сотвори со мною имене ради Твоего, яко блага милость Твоя. Свято и страшно имя Его. Хвалите, отроцы, Господа, хвалите имя Господне. Буди имя Господне благословенно отныне и до века. От восток солнца до запад хвально имя Господне. Не нам, Господи, не нам, но имени Твоему даждь славу, о милости Твоей и истине Твоей. Скорбь и болезнь обретох, и имя Господне призвах: о Господи, избави душу мою. Чашу спасения прииму и имя Господне призову. Тебе пожру жертву хвалы, и во имя Господне призову. Вси языцы обыдоша мя, и именем Господним противляхся им, обышедше обыдоша мя, и именем Господним противляхся им, обыдоша мя, яко пчелы сот, и разгорешася, яко огнь в тернии, и именем Господним противляхся им. Благословен Грядый во имя Господне, благословихом вы из дому Господня. Молитва по 16-й кафисме: Яко благословено и препрославлено есть имя Твое, Отца и Сына и Святаго Духа, ныне и присно, и во веки веков, аминь. Помянух в нощи имя Твое, Господи, и сохраних закон Твой. Призри на мя и помилуй мя, по суду любящих имя Твое. Молитва по 17-й кафисме: Владыко Господи Вседержителю и Творче всех, щедрот Отец, и милости Бог, от земли создавый человека, и показавый его по образу Твоему и по подобию, да и тем прославится великолепое имя Твое на земли <…> Твоею благодатию узрю и аз неприступныя Твоея славы доброту неизреченную, со всеми святыми Твоими, в нихже освятися, и прославися всечестное и великолепое имя Твое, Отца и Сына и Святаго Духа, ныне и присно, и во веки веков, аминь. Тамо бо взыдоша колена, колена Господня, свидение Израилево, исповедатися имени Господню. Помощь наша во имя Господа, сотворшаго небо и землю. Имене ради Твоего потерпех Тя, Господи, потерпе душа моя в слово Твое, упова душа моя на Господа. Хвалите имя Господне, хвалите, раби Господа. Хвалите Господа, яко благ Господь, пойте имени Его, яко добро. Господи, имя Твое в век и память Твоя в род и род. Поклонюся ко храму святому Твоему и исповемся имени Твоему о мило сти Твоей и истине Твоей, яко возвеличил еси над всем имя Твое святое. Обаче праведнии исповедятся имени Твоему, и вселятся правии с лицем Твоим. Изведи из темницы душу мою, исповедатися имени Твоему. Имене Твоего ради, Господи, живиши мя. Вознесу Тя, Боже мой, Царю мой, и благословлю имя Твое в век и в век века. На всяк день благословлю Тя и восхвалю имя Твое в век и в век века. Хвалу Господню возглаголют уста моя, и да благословит всяка плоть имя святое Его в век и в век века. Да восхвалят имя Господне: яко Той рече, и быша, Той повеле, и создашася. Да восхвалят имя Господне, яко вознесеся имя Того единаго. Да восхвалят имя Его в лице, в тимпане и псалтири да поют Ему. Молитва по совершении кафисм: Многомилостиве и Премилостиве Господи и всего добра Дателю, Человеколюбче, и всея вселенныя Царю, многоименитый Владыко и Господи! Нищ и убог есмь аз, дерзаю призывати чудное и страшное, и святое имя Твое, егоже вся тварь Небесных Сил страхом трепещут.

Песни Священного Писания: Господь сокрушаяй брани, Господь имя Ему. Яко имя Господне призвах, дадите величие Богу нашему. Господи, Боже наш, стяжи ны, Господи, разве Тебе иного не вемы, имя Твое именуем. Благословен еси, Господи, Боже отец наших, и хвально и прославлено имя Твое во веки. Не предаждь же нас до конца имене Твоего ради, и не разори завета Твоего, И изми нас по чудесем Твоим, и даждь славу имени Твоему, Господи. Благословен еси, Господи Боже отец наших, и препетый и превозносимый во веки. И благословено имя славы Твоея святое, препетое и превозносимое во веки. Песнь Богородицы: Яко сотвори Мне величие Сильный, и свято имя Его, и милость Его в роды родов боящимся Его.

Продолжим наш разговор в следующий раз.